Cusco e o equipo de mestres e mestras deséxavos un Feliz 2023!

Por fin puidemos producir as nosas bólas de nadal personalizadas empregando a impresora 3 D.

Cusco cóntanos algo sobre esta máquina que traballou a pleno rendemento para agasallar a cada neno e nena ca súa boliña.

As impresoras 3D  toman un deseño almacenado nun arquivo informático e convérteno en realidade, é dicir, nunha peza ou maqueta volumétrica con longo, ancho e alto.

A impresión realízase sen necesidade de moldes nin utillaxes de ningún tipo. Aos poucos, a máquina vai construíndo a peza mediante a deposición de capas de material que se van consolidando e formando a estrutura desexada. O proceso de construción é capa a capa e desde abaixo cara arriba.

As impresoras 3D utilizan normalmente materiais termoplásticos que saen derretidos a través dun filamento e endurécense ao arrefriarse.

 BO NADAL!

Cusco deséxavos unhas moi Felices Festas e tamén déixanos unhas recomendacións de lectura para estas vacacións.

E noraboa a Manuel, de 5º de primaria, polo primeiro premio do concurso de slogans 👏

 ASÍ CELEBRAMOS O 25 - N

Entre todos e todas creamos este mural incluíndo frases redactadas polos nenos e nenas contra a violencia de xénero.

Tamén queremos adicar un agredecemento especial a Nieves, Fina, Manola e Ana, da Asociación Cabanas Rural, que viñeron a facer un taller con todo o alumnado para elaborar flores de cor violeta. Quedaron preciosas e todos e todas disfrutamos moito do tempo xunt@s aprendendo dos maiores.

 20 N - DÍA UNIVERSAL DOS DEREITOS DA INFANCIA

Con motivo deste importante día, no cole teremos en breve dispoñible este precioso libro:

O autor, César Bona, resalta a importancia de que todos os nenos e nenas coñezan cales son os deberes e dereitos da infancia. Emprégase unha linguaxe cercana, agradable e divertida lembrando que por cada dereito que ten o neno e nena, hai polo menos un deber que cumprir.

 CAIXAS DA HORA DE LER

Durante o tempo de lectura establecido no noso horario lectivo (de 12:30h a 13h), comezaremos esta semana a poñer en marcha as nosas caixas da hora de ler.

Trátase dunha selección de libros seguindo os itinerarios lectores de cada nivel onde os nenos e nenas de cada clase poderán escoller aqueles que máis lles gusten e disfrutalos durante este tempo de ler. Cambiaranse trimestralmente, onde os titores e titoras farán unha nova selección de libros e contos.

 VISITA Ó DIARIO DE FERROL E Ó MUSEO DO HUMOR

Mentres os máis pequenos e pequenas do cole ían á saída programada en Narón, o alumnado de 5º e 6º de primaria visitou a redacción do Diario de Ferrol. Alí coñeceron o funcionamento do xornal e realizaron un percorrido polas instalacións.

Despois desprazáronse ó Museo do Humor de Fene onde se divertiron vendo diferentes debuxos de humoristas galegos e outros artistas internacionais, salas con cómics, espexos deformantes e esculturas que rinden homenaxe á defensa e importancia do humor.

Resaltar tamén a portada do Diario de Ferrol que os redactores e redactoras fixeron simbólicamente como recordo para o cole.

Ademais, o xornal adicoulle unha noticia á nosa visita, esta vez oficialmente, na edición do día seguinte.

 VISITA Á BIBLIOTECA DE NARÓN E Ó TEATRO

Este martes 15 de novembro o alumnado de infantil ata 4º de primaria visitou a biblioteca municipal de Narón. Alí a bibliotecaria explicounos como se organizaban os libros segundo a temática e a idade á que ían destinados, as actividades de animación á lectura que realizaban cada dous sábados e despois gozamos dun contacontos. Tamén houbo tempo para que os nenos e nenas de 3º e 4º de primaria lle leran uns libros ós máis cativos e cativas de infantil, 1º e 2º. 

Despois merendamos e ás 12 fumos ó auditorio a ver unha obra de teatro chamada Carabela, da compañia Galeteatro. A obra tiña lugar na "Illa Pequena de Plástico", onde unha cociñeira dun barco naufragado convive co plástico tirado ó mar polos humanos, así como con especies mutantes, paxaros choróns e vertedeiros que non alimentan. Mediante esta temática preténdese concienciar ó alumnado da importancia de coidar os nosos mares e de reciclar e reducir o consumo de plástico.

Deixámosvos aquí un video resumo da saída 😊

 PROGRAMA PRENSA-ESCUELA

O mércores pasado o alumnado de 5º e 6º de primaria recibiu ó periódico La Voz para levar a cabo o proxecto titulado Programa Prensa-Escuela, promovido por esta entidade. O obxectivo é que os nenos e nenas teñan a oportunidade de desenvolver o seu sentido crítico a través da prensa e que consigan familiarizarse co mundo da información e da comunicación. 

 ASÍ CELEBRAMOS O SAMAÍN

Unha vez aprendimos un pouquiño sobre as orixes desta festividade (tendes a historia na publicación anterior), deixámosvos unhas imaxes sobre o que fixemos no cole para celebrar este día.

 AS ORIXES DO SAMAÍN

A festa do Samaín (ou Samhain), celebración laica que representa a fin do verán, das colleitas e o inicio do outono, era a festa máis importante dos celtas e marcaba os inicios do ano novo celta. Esta era a data máis perigosa do seu calendario posto que o mundo dos mortos, o Outromundo, facíase accesible para os mortais, podendo pasar a formar parte del por culpa dun feitizo ou meigallo. Cando chegaban as celebracións do Samaín (e as longas noites escuras) tense por certo que os celtas colocaban unhas velas rudimentarias no interior das caveiras dos inimigos mortos, colocándoas nos cruces de camiños, nos arredores das aldeas e nas muradas dos seus castros. Isto servía para asustar ós inimigos, para asombro das súas xentes e para esconxurar os perigos da celebración.

Moitos anos despois o cristianismo escolleu estas datas para celebraren o Día de Defuntos e Tódolos Santos.

Aquí tendes un curto vídeo onde se explican con imaxes as orixes do Samaín:

 DÍA DAS BIBLIOTECAS NO CEIP MOSTEIRO DE CAAVEIRO

Isto é todo o que fixemos na xornada do Día das Bibliotecas no noso cole

E para rematar, deixámosvos con esta representación teatral da man do alumnado de 6º de primaria.

 FINALISTAS DO CONCURSO DE SLOGANS

Dende o cole queremos dar a noraboa a todos e todas por participar no concurso de slogans de animación á lectura. Fixéchedes un moi bo traballo! 👏👏

Aquí deixamos os nomes dos e das finalistas. O gañador ou gañadora saberémolo en decembro, preto de Nadal. 

- Artai López Bouza (6º Educación Infantil)

- Nouredinne Saidi (1º Educación Primaria)

- Liam Tabarés Paz (2º Educación Primaria)

- Xoel Paz Pico (3º Educación Primaria)

- Xandre Pérez Gabeiras (4º Educación Primaria)

- Manuel Permuy Piñeiro (5º Educación Primaria)

- Carla Seco Meizoso (6º Educación Primaria)

 DÍA DAS BIBLIOTECAS NA CASA DA CULTURA DA CAPELA

E para rematar, deixámosvos un vídeo onde o mago David Méndez fala da importancia dos libros e das bibliotecas, onde a maxia tamén ten lugar. Lembrádesvos do famoso mago do que nos estivo a falar?

 FORMACIÓN DE USUARIOS DA BIBLIOTECA

Esta semana o alumnado de 5º e 6º de primaria realizou unhas charlas formativas ó resto de cursos do cole sobre as normas de uso da biblioteca (servizo de préstamo, carnets, prazos de devolución, identificación dos libros por temática e curso, etc.). Queremos agradecerlles o gran traballo que fixeron! 

Lembrade que a biblioteca abre este luns 24 de outubro. A disfrutala moito!

MOSTRA: SLOGANS ANIMACIÓN Á LECTURA

 OBRADOIRO DE MAXIA