PROXIMAMENTE NO COLE: "Mulleres empoderadas"

Os días 27 de maio e 3 de xuño o Concello da Capela organizará no noso cole unhas actividades relacionadas coa igualdade de xénero. 👏👏

Botádelle unha ollada ao programa:

LETRAS GALEGAS 2022

 Na nosa biblio as Letras Galegas son protagonistas a diario, pero esta semana festexámolas con orgullo.

O xoves, os membros de Polo Correo do Vento presentáronnos a biografía de Florencio Delgado Gurriarán fusionando o galego coa música e coa creatividade e expresión artística dos nenos e nenas. 

Ben é certo, que xa coñecíamos un pouco da súa vida e obra, porque nas clases tiñamos realizado diferentes tarefas arredor da súa figura.

O venres comezamos a xornada cun contacontos de Marisa Irimia. A Biblioteca Municipal da Capela xa nos ten afeitos a este tipo de agasallos! 👏

Logo de merendar, foliada!!

Os membros da asociación Airiños da Capela acompañaron o noso baile co son en vivo e en directo dunha muiñeira. 

Tamén os/as alumnos/as que acoden á súa Escola de Música ensináronnos as súas habilidades tocando a gaita, batería e acordeón. Grandes artistas!

Música galega, baile, bo tempo e moita moita alegría para festexar por todo o alto  

a cultura de Galicia!

VÍDEO:

ACTIVIDADE DA ANPA

Con motivo da Semana do Libro e as Letras Galegas, a ANPA do noso cole propúxonos estas dúas actividades: un troco de libros e combinar fotografía, arte e literatura para crear un bookface.

Velaquí algunhas das vosas contribucións. Noraboa aos gañadores!

PDI Coñece a túa contorna - PREVENCIÓN DE INCENDIOS E VISITA Á CENTRAL HIDROELÉCTRICA

Seguimos aprendendo na nosa contorna!

Luz (de FEUGA) explicounos estupendamente os factores que inflúen na propagación de incendios e tamén como previlos e manter o noso monte nas condicións axeitadas. Hai que lembrar que, fai unha década, parte das nosas fragas sufriron os estragos da ola de incendios que afectou a Galicia. Aínda hoxe se notan as súas pegadas e por nada do mundo queremos que se volva repetir algo así.

Deseguida puxemos rumbo a un dos recantos do noso monte máis próximo con tres finalidades: visitar a Central Hidroeléctrica do Eume, realizar un pequeno roteiro ata a antiga central e continuar coa actividade de prevención de incendios que comezaramos no cole participando nunha ginkana. Ah! E merendar nunha contorna inigualable, por suposto.

Graciñas a todos os que colaborastes neste gran día: o concello da Capela, Luz e Secundino. 

EU, CUSCO, TAMÉN MIRO POLO MEU MONTE!

MÁIS NOVIDADES

Lembrade que nos expositores de novidades atoparedes máis!

NOVIDADES NA BIBLIO...

 Aquí vos deixo algunhas das novidades máis creativas que foron chegando aos nosos andeis!

Cusco, 🐭

PDI - COÑECE A TÚA CONTORNA & PROXECTO RÍOS

Seguimos investigando sobre o noso medio natural máis próximo e volvemos á ribeira do Río Sesín.

Alí, Ramsés, un membro de ADEGA (Asociación para a Defensa Ecolóxica de Galiza), explicounos e guiounos para buscar e observar pequenos invertebrados e tamén algún que outro exemplo de plantas autóctonas. 

A rapazada de 3º a 6º ten unha boa capacidade de observación e, en pouco tempo, xa recolleran mostras de diferentes macroinvertebrados (e tamén algún vertebrado) que logo de analizar volvemos soltar na auga. A existencia destes "bichiños" nos noso río indica que a calidade da auga nese momento era moi boa. Por iso, debemos comprometernos co seu coidado para que siga sendo así. 

🌳🌿🌍

Os máis pequerrechos do cole tamén o pasaron xenial nesta solleira mañá, merendando ao aire libre, desfrutando da paisaxe e observando e aprendendo moito coas explicacións de Secundino. Graciñas unha vez máis por acompañarnos.