miércoles, 11 de noviembre de 2026

INAUGURAMOS A BIBLIOTECA!

 Á volta da biblioteca municipal, onde escoitamos as divertidas historias da contacontos Sole Felloza, tocaba inaugurar a biblioteca do cole. 

Os nenos, tras ler a carta que escribiu Cusco, non só se puxeron mans á obra cos debuxos (os cales presentaremos máis adiante noutra entrada) senón que tamén prepararon, por cursos, unha pequena exposición introductoria do continente que lles tocou no PDI. 

Estas exposicións tiveron dous obxectivos: por unha banda amosar ao resto de compañeiros algúns datos e información importantes de cada un dos continentes, e por outra banda axudar e proporcionar a Cusco unha guía do que vai poder atopar na longa viaxe que vai emprender arredor do mundo. 

Compartimos con vos unhas imaxes da actividade e... agora sí, BIBLIOTECA INAUGURADA!!!!

ÁFRICA (Infantil)

EUROPA (1º ciclo de EP)

OCEANÍA (2º ciclo de EP)

AMÉRICA (5º de Primaria)

ASIA (6º de Primaria)


martes, 3 de noviembre de 2026

SOLE FELLOZA: CONTACONTOS NA BIBLIO MUNICIPAL!

 O xoves día 22 de outubro, como homenaxe polo día das bibliotecas escolares que tería lugar o sábado 24, asistimos á biblioteca municipal para escoitar as divertidas historias de Sole Felloza. 


Aproveitamos este espazo para agradecer á biblioteca municipal que poña en marcha este tipo de iniciativas que sen dúbida serven para achegar aos nenos a este espazo tan valioso, ao gusto pola lectura e pola infinidade de historias de todo tipo que esconden os libros, que son á súa vez, unha fonte de entretemento, emocións, coñecemento e sabiduría que debe perdurar sempre no tempo.

                       

Agardamos a próxima visita á sempre divertida biblioteca da Capela!!!

martes, 27 de octubre de 2026

LEMBRAMOS AS NORMAS DA BIBLIO!

 Como cada ano, as nenas e nenos de 6º de primaria son os encargados de lembrarlles aos máis pequenos tanto as normas da biblioteca como os aspectos máis importantes sobre o seu funcionamento (as distintas seccións, o emprego dos tarxetóns, os préstamos, etc)

Deixamos aquí unhas imaxes destas pequenas xornadas de formación entre iguais.





CUSCO VAI DAR A VOLTA AO MUNDO!

 O noso querido rato Cusco, o bibliotecario, con data 13 de outubro escribiu como cada ano unha carta para avisar ás nenas e nenos do cole que a inauguración da nosa biblioteca está a piques de producirse. 

Pero este ano é diferente. Cusco non só escribiu por ese motivo, senon para avisar tamén de que vai botar uns meses fora do cole... Quere dar a volta ao mundo!!

Como xa contamos na primeira entrada do blogue deste curso, o tema escollido para o PDI (Proxecto Documental Integrado) foi "Os Continentes". É por iso que Cusco deixa a biblio en mans da súa amiga e axudante Noite, para axudar aos nenos con esta temática vivindo experiencias en primeira persoa percorrendo o mundo enteiro. 

Deixamos tamén por aquí algunhas imaxes das nenas e nenos de 6º de EP, que como bos axundantes de Cusco encargáronse de levar e ler a carta por todas as aulas do cole. 





PRIMEIRA SESIÓN DO PROXECTO "ENRAIZADAS"

Como cada ano dende hai xa uns cantos cursos, neste mes de outubro tivo lugar a primeira sesión do proxecto "Enraizadas", impulsado pola asociación Euroeume.

Este proxecto céntrase na custodia do territorio nas comarcas do Eume e Ortegal, na agroecoloxía, na soberanía alimentaria e na loita pola igualdade dando visibilidade e defendendo o papel que desenvolven as mulleres no medio rural. 

Dentro das escolas e das aulas, o obxectivo deste proxecto non é outro que facer talleres e actividades que sirvan de canle para trasmitir valores de igualdade, sostibilidade e arraigo cara a contorna rural.

A diferencia dos anos anteriores nos que este proxecto fíxose coas nenas e nenos de 3º ciclo, neste curso 2026/2027 o "público" obxectivo será o alumnado de 2º ciclo, se ben é certo que na próxima sesión que terá lugar o día 18 de novembro, estarán presentes todos os alumnos de 3º a 6º da etapa de primaria. Isto é porque a temática de Enraizadas deste ano está moi relacionada coa "Horta", polo que os nenos de 3º ciclo (que están a desenvolver o proxecto de "Horta e composteiro escolar") tamén estarán presentes nesta segunda sesión, aprendendo e máis aportando o que xa foron aprendendo. 

Tras esta primeira sesión introductoria, as rapazas e rapaces xa agardan pola segunda sesión da que acabamos de falar. 

Saúdos!

domingo, 25 de octubre de 2026

IMOS AOS COGOMELOS!

 O pasado mércores 14 de outubro, tivemos a gran sorte de poder pasar unha marabillosa mañá achegándonos ao monte e aprendendo cousas moi interesantes sobre o extensísimo reino dos fungos e máis concretamente dos seus froitos: os cogomelos. Todo isto da man de dous expertos en micoloxía: Xandre Ramos (pai dos nosos queridos alumnos Breixo e Anxo) e Luis Cuba, micólogo autodidacta e divulgador. 

Pouco despois das 9:30 xa íamos todos no bus camiño do Forgoselo, coas mochilas cargadas de merendas pero tamén cheas de ilusión. O tempo non podía ser mellor para a actividade que íamos desenvolver: nada de vento, ceos despexados que deixaron ver o sol desde primeira hora, e unha temperatura super agradable que máis preto do medio día obrigounos a quitar chaquetas e sudadoiros. 

Ao pouco de comezar a ruta polo monte, un grupiño de tres preciosos "Boletus Edulis", un dos cogomelos con maior valor gastronómico de todos os que temos en Galicia, sorprendeunos de súpeto sen contar con eles. E así fomos atopando unha morea de especies pertencentes a distintas familias mentres Luis e Xandre identificaban perfectamente cada unha delas e ían explicándonos as súas características e pequenos trucos para distinguir uns cogomelos dos outros.

E así foi pasando esta interesante clase de ciencias no medio natural; entre amanitas, rúsulas, boletus, lactarius, agaricus, coprinus...


Tal foi o éxito da saída que a prensa local non tardou en facerse eco dunha excursión desas que crean afición. 


Dende o noso blog animámosvos a descubrir este mundillo e a facer este tipo de actividades en familia e con amigos no medio natural. A micoloxía é un mundo infinito e precioso, onde nunca deixamos de aprender, e que combina ciencia, natureza e gastronomía. 

Iso sí, sempre hai que EXTREMAR AS PRECAUCIÓNS, xa que o descoñecemento pode poñer en risco a nosa saúde e incluso a nosa vida. Por iso é importante contar coa axuda de xente que sabe máis ca nós e ante a máis mínima dúbida, sempre mellor deixar os cogomelos no monte que levalos para consumir. 

Agradecer por suposto a Xandre e a Luis polo seu tempo, dedicación e bo facer coas nenas e nenos do noso cole. Agardamos a seguinte con moitas ganas!!!!!

jueves, 24 de septiembre de 2026

Novo curso, nova viaxe!

 Tras a volta das vacacións de verán, damos a benvida ao novo curso e recibimos con ledicia, ilusión e un gran sorriso a todas as nenas e nenos do noso cole, a quenes despois de gozar duns meses de descanso e diversión, tócalles reencontrarse cos seus queridos compañeiros e mestres para afrontar novos retos, aventuras, experiencias e aprendizaxes. 


 Coma xa ven sendo tradición, preparouse un mural de benvida relacionado coa temática escollida para o PDI (Proxecto Documental Integrado) deste curso: "Os continentes". Ao longo dos próximos meses, teremos unha magnífica oportunidade de "viaxar" a través dos distintos continentes, ubicándonos un pouco mellor no noso planeta Terra á vez que descubrimos diferentes culturas, linguas e modos de vida.


 Despois de coñecer as súas novas aulas e titores, contar as anécdotas dun marabilloso verán e comentar por enriba as novidades do novo curso, baixamos ao pavillón para pasar un rato divertido grazas á ANPA do cole, da man de Bandullo Azul (Fran Ameixeiras e Fran Campos) e o seu espectáculo "Vicki e a felicidade", un rapaz ao que lle encanta cantar e bailar e que quere devolver a felicidade á súa aldea, onde a xente está sempre de mal humor.

 Por último, un recreo longo, a primeira merenda do curso, un pequeno recordatorio das normas do comedor e... un circuito de xogos para despedir un primeiro día de cole dos que deixan ganas de volver ao día seguinte! 



 Apertas para tod@s e que teñades un bo e bonito curso!






martes, 9 de junio de 2026

Recomendacións lectoras para o verán



 

PDI Capelarte: reinterpretación dunha obra

Traballando o arte contemporáneo, preguntámonos que significa reinterpretar unha obra, que é copia e que é inspiración. Tras ver diferentes exemplos, puxéronse mans á obra para darlle unha volta á obra "O fillo do home" de René Magritte.


To reinterpret an art piece de Laura Cuba




PDI Capelarte: pinturas rupestres

 O alumnado do 1º ciclo de EP reproduciu unhas pinturas rupestres dentro do proxecto de centro Capelarte. Están xa en proceso de crear a súa propia cova!













Estampación

 Estampación con goma eva.



Apadriñamentos lectores: Xuño