8 DE MARZO - DÍA DA MULLER

Os contacontos que se foron celebrando neste curso estiveron moi vencellados á defensa da igualdade de dereitos entre mulleres e homes. 

Desta volta, as persoas narradoras foron as/os nosas/os compis de 6º que nos contaron as historias de "Unha feliz catástrofe" e "Elenita". Como nos gustan estas sesións de lectura compartida! 

Aparte de reflexionar sobre os valores agochados nestas lecturas, puxémonos mans á obra e creamos unhas magníficas flores coa técnica da globoflexia para agasallar ás mulleres das nosas vidas. 

Feliz día a todAs! 💟

ENTROIDO NA FRAGA

Ratiños, ras, esquíos, abellas, bufos... Animaliños das fragas, facendo un guiño ao noso PDI "Coñece a túa contorna". 

Logo dos bailes, o xuízo do Meco e a merenda de Entroido, 

Anxo Moure chegou na súa bicicleta para deleitarnos cunha historia do bosque, coas súas rimas e ritmos musicais, sempre desde unha perspectiva ecolóxica e de fomento do respecto ao medio ambiente. 👏🌳🍃

PROXIMAMENTE... Anxo Moure!

 Estas semanas vinvos a todos e todas moi apurados, recorta por aquí, pega por alá, cose polo outro lado... Asomei o fociño polas portas e, como non podía ser doutra forma neste curso, puiden albiscar as figuras de diferentes animaliños das fragas.

Pois mirade por onde, tíñavos preparada unha sorpresa. Cal é o escritor e contacontos que máis quere e protexe a natureza? Pois claro, Anxo Moure! 

O día do Entroido, logo das vosas xeniais actuacións e o xuízo do Meco, poderemos desfrutar do seu espectáculo O Entroido no bosque 🌳🌿

Seguro que o pasamos en grande!

O voso amigo, Cusco. 🐭

DÍA DE ROSALÍA - #SementadePensamentos

Un ano máis, lembramos a figura da nosa poetisa, da muller que tanto defendeu a nosa lingua, a nosa terra e a igualdade. A planta dos pensamentos era a súa preferida, pensamentos que florecían maxistralmente para formar parte da nosa literatura e da nosa identidade, por sempre. 

"Eu son libre, nada pode conter a marcha dos meus pensamentos e eles son a lei que rexe o meu destino".

Coidade con mimo os vosos! 😉🌸 🐭

Aquí tedes un Genially sobre a súa biografía, feito polos Equipos de Dinamización da Lingua Galega de diferentes colexios de Galicia. Grazas por compartilo!

COMEZA O ENTROIDO!

 Achégase a semana máis trouleira do ano! Atentas/os aos mandados do Meco! 

 

O Meco xa está aquí

cun recado para ti:

O luns para comezar

algo no pescozo has de colgar.

NOVIDADES

Cusco non para de traervos novos libros para a súa colección. Estade atentos aos andeis de novidades da biblio porque é difícil seguir o seu ritmo para publicalos por aquí. Deixámosvos só unha pequena mostra deles: 

PDI Coñece a túa contorna - A CAPELA EN IMAXES

Xa no 1º trimestre, Cusco enviouvos unha carta na que vos propoñía que saírades acompañados da vosa familia para facer un retrato "ao natural" da vosa contorna. 

As fotografías que nos achegastes son preciosas e poñen de relevancia algo que xa sabíamos, a gran beleza e valor natural do entorno no que se sitúa o colexio e as vosas casas. 

Como xa sabedes, algunhas delas ilustraron o calendario deste ano, pero podedes ver o resto no noso recibidor e tamén aquí nesta publicación: 

Moitas grazas pola vosa colaboración!