Ola compañeiras/os!
Non podía marchar de vacacións sen antes deixarvos unhas recomendacións de lectura para o verán.. Seguro que xa tedes algún libro na mente, pero para os máis indecisos, déixovos algunhas ideas.
Aproveito para felicitarvos pola vosa actitude diante do que foi un dos cursos máis complicados. Tedes máis que merecidas unhas boas vacacións!
Ata a volta!
O voso amigo Cusco.
O vindeiro luns, 21 de xuño, iremos á casa da cultura para desfrutar destas fantásticas historias que nos contará Fátima Fernández. Grazas de novo á Biblioteca Municipal por convidarnos!
E lembrade estar atentos ao taboleiro de anuncios do cole, aínda teremos tempo para máis actividades de fin de curso... 👏😉
Ola compañeiros/as!
Alégrome moito de que vos gustaran as lecturas que vos propuxen para o trimestre. Abofé que son unhas historias ben interesantes e entretidas!
Pero aínda teño outra sorpresiña para vós, pois o vindeiro venres día 18 poderemos disfrutar no cole dunhas fantásticas animacións sobre elas.
Non volas perdades!
Só a lingua galega conta con palabras tan fermosas: bico, cóxegas, luscofusco, aperta, vagalume, axiña, morriña, brincadeira... E só no noso colexio contamos con artistas tan creativos para facelas lucir como se merecen.
A presumir das chapas con orgullo! Eu xa teño a miña 😉. Aínda que traballiño me costou atopar o lugar da miña peza no quebracabezas para gañala.
Feliz 17 de maio, Galicia!
Cusco
Como vedes, nestas últimas semanas non parou a actividade na biblioteca de Cusco.
Retomamos os escornabots que deixaramos aparcados no recuncho de robótica para realizar prácticas de movemento. Nesta ocasión, os nosos amigos desprazáronse por un taboleiro con imaxes dos libros que viñamos de ler durante o trimestre.
Demostrastes boas habilidades para a programación... e creatividade! Non hai máis que ver que feitiños quedaron os seus traxes! 👏
