23 DE ABRIL: DÍA DO LIBRO

Ola compañeiras e compañeiros!

Como xa vos anunciaba ao comezo da semana, hoxe celebramos o Día Internacional do Libro na compañía de Pinto & Chinto. Aínda que a visita a min tamén se me fixo un pouco curta, puidemos conversar sobre os seus fantásticos libros e conseguimos que algúns fosen hoxe asinados para a casa. Aqueles que non puidestes levalos, tede paciencia, axiña estarán de volta. 😉

Aquí vos deixo unha presentación. Botádelle unha ollada ao froito de todo ese traballo que vos vin realizar nestes días: o mural coa montaxe fotográfica e os audiocontos. Que ben o pasamos meténdonos na pel dos personaxes! 

Feliz día! 📚

Cusco

SEMANA DO LIBRO

Achégase unha das xornadas máis especiais para as bibliotecas escolares:

o Día Internacional do Libro. 

Desta volta si que poderemos gozar da visita de Pinto & Chinto (podedes coñecer máis aquí). Charlaremos con eles sobre o seu traballo e especialmente, sobre os fabulosos libros que nos acompañaron durante as "Horas de ler". 

Anotade na axenda: o vindeiro venres, 23 de abril, a iso das 11 h.

2 DE ABRIL: DÍA INTERNACIONAL DO LIBRO INFANTIL

Hoxe é o día de lembrar aos grandes amigos que tedes nos andeis da biblio de Cusco. Sabemos que vos encantan! 

Cando lemos, á nosa mente médranlle ás. 
Cando escribimos, os nosos dedos cantan. 

As palabras son golpes de tambor e frautas na páxina,
paxaros voadores e elefantes trompeteiros, 
ríos que flúen, fervenzas que caen,
bolboretas que viran
alto no ceo! 

As palabras convídannos a bailar 

ritmos, rimas, latexos do corazón,

cascos e bater de ás, contos antigos e novos,

fantasías e verdades.

A MÚSICA DAS PALABRAS, por Margarita Engle 

(Tradución de María Canosa)

Ilustración de Roger Mello.

MÁIS NOVIDADES NA BIBLIO!

 Cusco trouxo máis novidades aos andeis da biblio. Non volas perdades! E lembrade que tamén se ampliou a sección de banda deseñada (cómic). Parece que o noso amigo escoitou as vosas peticións! 👏

8M - Día da muller

Boas raparigos e raparigas! Aquí, Cusco retransmitindo en directo dende o escritorio. 

Xa volvemos a estar no 8 de marzo, que é o día internacional da muller. Dende a biblioteca puiden ver que estivéstedes a traballar sen descanso na investigación sobre algunhas das mulleres científicas de Galicia e outras partes do mundo. 

Lembrade pasar polo mural para escanear os códigos QR e poder ver todo ese gran traballo! Déixovos aquí tamén unha recompilación. 

Feliz día a todas! 

8M na Capela

24 de FEBREIRO: Día de Rosalía de Castro

Un 24 de febreiro nacía en Galicia unha das nosas escritoras preferidas, a que marcaría un antes e un despois no uso e defensa da lingua galega. Hoxe lembramos a súa obra con agarimo por medio de diferentes actividades na aula. 

Ademais, Cusco quere compartir con vós esta fantástica animación sobre a súa vida. Non vola perdades!

Narración realizada polo alumnado do Colexio San Pío X (Ourense) en colaboración con: TikTaK Draw, a Fundación de Rosalía de Castro e os membros dos Equipos de Dinamización Lingüística de Galicia.

TEMPO DE ENTROIDO!

No colexio seguimos mantendo as tradicións e as ganas de troula! Así que na vindeira semana non pode faltar unha pequena celebración dunha das nosas festas máis enxebres. Iso si, toca facelo de forma diferente e con moito sentidiño. 

Chega o primeiro dos mandados... 👀🎭

E para rematar, mañá xoves: 

Mañá completas a peza: trae algo nos pés, na cintura, pescozo e... na cabeza!